Rannsóknir á starfsvæntingum fólks eru mikilvægar í flóknu samfélagi nútímans. Þróun slíkra væntinga er, hjá flestum, ævilangt ferli sem mótast af væntingum einstaklingsins um framtíðarstarf, menntun hans og samspili við atvinnuumhverfi  það sem hann býr við. Það er eðlilegt að margir skipti um starf annað hvort af neyð, vegna atvinnumissis eða af frjálsum vilja vegna eftirspurnar í störfum sem einstaklingar eru þjálfaðir í. Eftirspurn eftir fólki með tiltekna menntun í síbreytilegu þjóðfélagi eykur líkur á því að menntun taki breytingum í þá átt að vera sveigjanleg og byggjast á endurmenntun á starfsævinni. Formleg menntun mun verða undirstaðan í þróun starfsumhverfis framtíðarinnar bæði til hagsbóta fyrir einstaklinga og þjóðfélag því hún er ódýrasta leiðin til að koma þekkingu frá einni kynslóð til annarrar. Auk þess kallar sérhæfður vinnumarkaður á starfskrafta sem þjálfaðir eru á sérhæfðum sviðum.

​

Mikilvægur vendipunktur eða áfangi í þróun starfsvæntinga  eru væntingar unglinga á lokaári í skyldunámi. Áður en unglingsárin skella á hefur umhverfið haft mikil áhrif en nú fara ,,raunveru-legar'' væntingar unglinsins sjálfs að fá sífellt meira vægi. Fjölskylda og aðrir í umhverfi hans líta oft á þetta sem upphafið að vegferð á starfsferilsbrautinni. Þessi vegferð fer fljótlega að leiða til vangaveltna um framtíðarstarf sem byggjast þá á því að opna og loka ýmsum brautum til framtíðarstarfa. Þetta birtist t.d. í því að margir unglingar fara að skipta áhugasviði sínu í framtíðarstörf á verknámssviði eða bóknámssviði. 

Félagsleg staða fjölskyldu unglingsins getur haft áhrif á val hans um framhald eftir skyldunám. Unglingar hafa mögulega ólíkan fjölda starfa í nánasta umhverfi sínu en  þar getur  verið að finna vísi að hugsanlegu framtíðarstarfi þeirra. Þeir sem eiga foreldra sem eru í störfum sem byggjast á bóknámi hafa oft ekki sömu nálægð við störf foreldranna og þeir sem eiga foreldra sem eru í störfum sem byggja á tækni- eða starfsámi. Unglingar sem eiga t.d. föður sem er trésmiður læra oft um starf hans með því að aðstoða hann í starfi hans. Nálægðin er því meiri en t.d. hjá unglingi sem á foreldri sem er lögfræðingur. Unglingar geta því átt mismunandi greiðan aðgang að starfsfyrirmyndum sem geta haft áhrif á starfsvæntingar þeirra.

​

Framsetning þeirra rannsókna sem gerð er grein fyrir hér mun eingöngu verða á þessum vef. Niðurstöður eru gefnar í gröfum og gerð er grein fyrir aðferðafræði sem beitt er við úrvinnslu gagna. Rannsóknir sem gerðar eru í dag eru framkvæmdar af ýmsum aðilum í samfélaginu bæði í menntastofnunum og fyrirtækjum. Þar er fjöldi einstaklinga sem hlotið hefur þjálfun í rannsóknarstörfum og sú þekking sem verður til við vinnu þeirra er samfélaginu dýrmæt. Vísindastörf eru dæmi um hvernig starfaflóran hefur breyst í gegnum tíðina því algengara var að hér áður fyrr væru vísindi að mestu stunduð við æðri menntastofnanir. Núna spretta þær einnig oft af þörf fyrir nýja þekkingu sem verður grundvöllur þróunar nýrra afurða til að mæta eftirspurn á neytendamarkaði.